美欠每個中國人5700人幣 2011-08-10

新報
B03  |   新報財經  |   中環物語  |   By 糖糖     2011-08-10

   

●暑假檔期有套荷里活猛片上影，叫《美國隊長》，有口痕友話，套戲都唔知攞景定贈慶，美國依家肯定唔係一個負責任嘅隊長啦。今次美國俾標普降佢主權信貸評級，由AAA燉咗落AA+，即刻有專家出嚟呼籲，中國嘅外匯儲備唔好再咁依賴美國咁話。

中國宜家係美國最大國債持有國，根據資料顯示，中國持有美國國債1.16萬億美金，有報道計一計數，發現呢條數相等於美國爭我哋中國人每人5,700元人民幣。

寄望美聯儲救市

美國佬其實都心中有數啦，市場都睇死佢哋會再開印鈔機印銀紙喇，佢仲有邊招吖。不過，糖糖希望佢哋以後啲電影唔好再係咁大美國主義喇，除非佢哋唔識面紅啫。

物極必反。問題係，宜家個市到咗極點未呢？噚日賣地氣氛奇差，5分鐘之內叫得一口價就以55億賣出九肚山地皮，震撼人心。再睇埋個股市仲得人驚，開市無耐已經插水式下跌1,600點。

雖然其後跌幅數窄，升返上二萬點樓上，可惜歐洲股市大唔爭氣，結果港股最終失守二萬點。後市係點，已經無人識估，啲專家已經唔知個支持位喺邊，唯有寄望美國聯儲局議息後會有啲令市場驚喜嘅消息公布喺啦。

中國CPI未回令人憂

●福無重至，禍不單行。依家點止單行呀，如果加埋噚日祖國嘅CPI數據，直情係三行啦。7月CPI再創3年新高，同比漲6.5%，並無好似啲專家上月時估計會從高位回落，唯一可幸嘅係增速開始減慢，到底8月份嘅數據會唔會有改善，唔通真係要望天打卦先得？

http：//tongtong-hkdn.blogspot.com/