B03 | 新報財經 | 中環物語 | By 糖糖 2011-06-16
小小超同小股東「一笑泯恩仇」
●呢輪電盈小股東動作多多，先後寫信畀證監韋奕禮，同埋東亞嘅寶寶哥，日前（6月13日）佢哋仲出動抗議呢招，要求對話，佢哋對電盈（0008）嘅真誠終於感動到電盈主席小小超。
電盈小股東大聯盟嘅代表，喺噚日終於同小小超舉行咗歷史性嘅會面，大大話話都傾咗成40分鐘喎！對於秒秒鐘幾千萬上落嘅小小超嚟講，40分鐘真係好畀面。講返今次破冰會面，聯盟代表同糖糖講，話好感動、好高興同好欣慰，甚至要收返之前批評電盈係「曲線私有化、陰乾」等字眼。
聯盟代表話，感動係因為喺呢40分鐘裏面，小小超揸住計數機，親自計數俾聯盟代表睇，解釋電盈分拆電訊業務上市對小股東嘅好處，完全唔係空談。
40分鐘完全唔係空談
代表仲話，小小超喺見面同會議完結時，兩次握手都係強而有力，係好有誠意嘅握手方法，甚至較之前同李國寶握手時更加有力！糖糖完全感受唔到喺咩感覺，事關李澤楷先生次次喺公開場合出現都係來去匆匆，莫講話握手，連交換張卡片都屬「不可能的任務」。不過，聽到聯盟代表形容當時嘅情況，又的確感受到代表嗰種歡欣。電盈小股東大聯盟有無被小小超說服咗，改為支持電盈分拆電訊業務上市呢？代表話佢無話贊成，仍然希望電盈方面可以有更多數據同理據話畀全體股東知，到底分拆對小股東有乜益處。
聯盟代表仲話，好希望陸續會有面談機會，而電盈亦同意會積極考慮6月17日股東會後安排同聯盟代表會面。所謂雙嗌唔好口，宜家坐低有傾有講，咁咪好囉！
http://tongtong-hkdn.blogspot.com/
沒有留言:
發佈留言