特步丁水波最鍾意馬拉松 2011-07-25

新報
B03  |   新報財經  |   中環物語  |   By 糖糖     2011-07-25

丁水波最鍾意馬拉松    

●體育用品股近期真是當黑，但並唔係每家狀況都一樣。特步（1368）上個星期喺廈門舉行明年首季的訂貨會及同維拉利爾簽約儀式，希望提升自己的品牌形象。

相信大家都知道，特步已經贊助咗伯明翰，今次又贊助西甲球隊，可想而知管理層對贊助足球非常堅定。不過，原來主席丁水波最中意嘅運動，原來係跑步至真，仲贊助咗好多場馬拉松比賽添，唔怪得佢哋嘅口號都係「愛跑步愛特步」啦！唔知幾時，丁主席都來香港跑下馬拉松呢？

對於近期接連有民企出事，俾評級機構踩，特步CFO何睿博Terry就好興，他就話美國的監管夠好啦，米一樣出事，安然同間會計師樓都執埋，唔可以一竹篙打一船人！

富豪揸靚車追「回水」

●國內高級名牌家具店達芬奇懷疑用國產貨充外國貨，件事擾攘多日，達芬奇老闆終於抵受唔住傳媒壓力，喺官網上承認其代理嘅湯瑪斯（Thomasville）美式家具，確實存在部份產品喺中國生產，並且通過上海保稅區進口到中國嘅情形。

糖糖連日嚟都有追蹤住呢單新聞嘅發展，事關每當揭開啲專介紹貴嘢嘅雜誌，糖糖都總見到達芬奇個全版廣告，加上佢哋係以亞洲規模最大、檔次最高嘅家居代理公司自居，更多次被《胡潤百富雜誌》選為「最受富豪青睞家居品牌獎」，估唔到揭開咗個底牌，原來都係有呃人成份。

達芬奇呢個難攤子，相信就算畀世界最出色處理危機應付嘅公關，都唔識點幫佢哋收科。事關內地已經有好多富豪，要求達芬奇回水，其中有報道話，有個有錢佬幫襯咗佢哋買咗成千萬家具，無錯，係用成千萬人仔幫佢哋買家具，大喊回水，而呢單回水個案只係冰山一角。

咁又難怪啲有錢佬咁做，事關內地有好多哋方都有老翻外國的設計師家品，原本賣成萬蚊一盞燈，內地99.99%相似嘅，只需999蚊，糖糖有次去閒逛呢啲老翻家具商場，仲撞到一對香港明星夫婦添。

既然內地富豪唔買老翻，梗係想買原裝入口嘅正貨啦，點知都係俾人揾笨，所以唔嬲就話。據稱，達芬奇銷售點外，周不時被名車堵塞，全部都係要求回水嘅富豪。好彩達芬奇未上市啫，否則又被啲外資行借機出報告狂插民企，到時真係累街坊。

http://tongtong-hkdn.blogspot.com/