中國想栽培世界級基金 2011-07-07

新報
B03  |   新報財經  |   中環物語  |   By 糖糖  2011-07-07

中國想栽培世界級基金

個市就係咁架啦，一係就水盡鵝飛，搞到啲財經編輯嗌晒救命，要周圍揾新聞，一係就一次過堆埋嚟，搞到有氣無掟抖。噚日就係後者喇，前國家主席江澤民仙遊、人民銀行又宣布加息、滙豐亦趁熱鬧上調按息，一次過湧埋嚟，對今日個大市有乜影響呢？有分析員認為，最多跌300點到，之後會喘定，咦！想低位執便貨嘅朋友真係要睇實個市喇。

好多公司企業都會搞飯局，一方面同傳媒聯絡下感情，另一方面就發表公司消息。噚日基金公會搞咗個午宴，一眾行家準時到場，去到現場發覺有啲唔對路，原來所謂飯局，係基金公會邀請啲基金經理食飯，而記者唔該坐埋一邊齋聽。

有部份行家見到咁嘅環境索性走人，糖糖雖然都係空肚，但難得有咁多基金經理在場，一於聽下佢哋講乜。後來到咗問答環節，只有小貓三兩隻手舉手發問，於是乎有行家舉手預備問問題，點知公關姐姐突然出嚟阻止，原來呢餐午宴傳媒唔單止無得食，就連問問題都唔得，唉，真係揾食艱難。


藉小QFII培訓人材

講返個午餐會，會上Z-BEN商務諮詢董事張磊德（Peter Alexander）話，相信不出5年，就會有間世界級嘅基金公司喺中國出現，而據佢所講，呢個亦都係點解中央要搞「小QFII」原因。佢話點解要無喇喇畀錢外國公司賺先，無非係想培訓中資投資機構人材，等佢哋喺香港吸收下經驗，等將來可以做到世界級機構。

Peter仲話，開放「小QFII」俾中資機構仲有另一層意義，由於依家外資只能透過「QFII」投資內地，擁有額度嘅外資行因而可以收取較高投資費用，而當加入「小QFII」後，投資費用收入可部份轉移到中資機構，幫助內地企業增加盈利，並透過加強競爭，另整體收費水平可以降低。所以幾時都話，阿爺做嘢係自然有佢嘅意思。

http://tongtong-hkdn.blogspot.com/