免費報進入戰國時代 2011-08-11

新報
B03  |   新報財經  |   中環物語  |   By 糖糖     2011-08-11

免費報進入戰國時代    

生果日報出嘅免費報紙《爽報》下個星期一就面世，為香港嘅免費報章市場進入大混戰正式拉開序幕。若果唔計Standard出嘅份英文免費報，中文免費報章剛剛好係戰國七雄嘅格局，分別係新報財經報、晴報、爽報、頭條日報、頭條財經報、都市日報、am730。

多隻香爐多隻鬼，呢場仗到底係會令個市場越來越壯大，定係加速市場滅亡，就係要打過先知。但正所謂「鷸蚌相爭，漁人得利」，呢波免費報紙大混戰，糖糖就覺得有幾幫人都會得益。

《Investor》首先摺埋

首先當然係讀者啦，可以想像得到，7份報紙必定會向讀者爭相獻媚，希望令廣大讀者們垂青。其次就係每朝不厭其煩不停排隊攞報紙去賣嘅街坊喇，事關收入一定有所增加。另一幫可以得益嘅，就係每日守尾門負責派報紙嘅阿姐喇，市場壯大咗，人手需求自然多咗，失業率都少啲啦。而且分分鐘呢幫派報紙阿姐，仲可以多啲職業上選擇，一於東家唔派派西家，幾好呀。

講到打仗，難免會有死傷，糖糖收到風，率先陣亡嘅竟然係半賣半送嘅一份財經雜誌《Investor》。號稱每期發行量成10萬本嘅《Investor》，大約1年貨仔就摺埋，確係令到身為行家嘅糖糖無語。

中大生奪保誠獎學金

英國保誠喺香港搞咗個精算師獎學金計劃，資助喺香港讀精算學系嘅同學仔。而第一筆總額5萬蚊嘅獎學金，由中大精算二年級高家敏同學仔獲得。英國保誠香港人力資源總監劉玉瑤就讚揚高同學，喺英國保誠實習期間表現傑出，仲話會繼續透過推出呢個計劃，為公司吸納人才咁話。

http：//tongtong-hkdn.blogspot.com/