iBond低調無上市儀式 2011-07-29

新報
B03  |   新報財經  |   中環物語  |   By 糖糖     2011-07-29

iBond低調無上市儀式    

政府搞嘅通脹掛鈎債券（iBond），今日就喺港交所（0388）掛牌，其實由構思呢個idea開始，已經不被輿論看好，甚至有人毫不留情面地形容iBond係垃圾都不如，唔知大家有無抽番一兩手玩下咁呢？糖糖今次就無出到手喇，事關糖糖連iPhone都無買，又點會湊熱鬧去買iBond呢？

不過噚日iBond個暗盤價錄得106.5蚊，市場個反應又唔係咁差啫，到底iBond首日掛牌嘅表現係龍定係蟲，今日終於揭曉喇。

事實上，雖然政府事前廣布分銷網點，20間銀行加埋有成千個分銷點，不過只係得15.58萬人申請，似乎市民唔多撐iBond喎。亦都可能因為今次政府個如意算盤打唔響，所以喺今日上市儀式後，索性連上市儀式呢個動作都慳番，似乎政府都唔多睇好喎。事關過往舉凡有政府資產上市，好似盈富基金（2800）、五隧一橋債券等等，都會搞個儀式慶祝下，不過今次iBond乜慶祝都欠奉，真係同「券」唔同命。至於港交所發言人就話，其實除咗發行人特別要求，否則基金同債券係唔會舉行上市儀式嘅。啊！係咩？我反正信咗！

美食博覽出招搶客

‧一年一度的美食博覽將於8月開展，為提前造勢，噚日主辦方特地舉辦傳媒預覽以起到宣傳之效。各參展商都不遺餘力推介，連鮑魚、人參都送埋給記者試食添。

預覽場館唔大，傳媒爭相湧入更顯得擠逼，倒是符合香港展覽的特色。飲品、健康食品、補品等各種價格食品應有盡有，只需在會場內行一轉，贈品都拿到手軟。

安記海味係老字號最大手筆，行過嘅傳媒都有鮑魚相贈試食。而益力多就派出一個四五歲嘅可愛小女孩派發試飲品，絕招一出，立刻吸引大量關注，勁過書展?模，效果極佳。營商之道，果然巳係腦力戰啊！

http://tongtong-hkdn.blogspot.com/