索羅斯果真老馬有火！ 2011-08-15

新報
B03  |   新報財經  |   中環物語  |   By 糖糖     2011-08-15

索羅斯果真老馬有火！    

●一個人點樣先至叫出名呢？今年已經80歲嘅索羅斯（George Soros），自從1997年金融風暴一役後，變得舉世知名，有關佢啲新聞一般只會喺經濟版同港聞版見到，不過今次唔同喇，連娛樂版都登。從年齡上嚟睇，索羅斯雖然已經步入風燭殘年，但佢唔單止喺金融事業上表現得精力充沛，連感情生活上亦都多姿多彩，一啲都唔似係垂垂老矣嘅阿伯。

索羅斯近日俾佢28歲嘅前女友告，話佢食言，沒有買一間位於紐約公寓俾佢。唔單止咁，個女仔仲話索羅斯打佢，仲企圖用台燈打佢，試圖令佢窒息。索羅斯嘅律師當然否認，認為無事實根據。到底係笑料一則定係真有其事，真係要等個官去判，不過索羅斯有錢成咁，個女仔有無實力去請個名大狀打贏呢場官司呢？

俄侶出書用中文

●披荊斬棘嚟到香港上市嘅俄侶（0486），係聯交所首家代表俄羅斯嘅上市公司，俄侶除咗嚟做先頭部隊之外，原來仲肩負起宣揚俄羅斯嘅重任。

佢哋之前唔單止出咗本書叫《愛·俄羅斯》，仲同某電台聯合搞咗個「俄羅斯同你做個Friend」有獎問答比賽，俄侶公關姐姐Vera話，今次個比賽吸引咗過千名Facebook用戶參加，大部份參賽者都答中晒全部9條問題，於是俄侶就以抽獎形式，抽出3名幸運兒，勝出獎品包括雙人俄羅斯來回機票及酒店、潮物iPad及同iPhone4智能手機，認真吸引。

Vera話，中俄兩國作為毗鄰，有好多共通點，俄侶作為香港首家代表俄羅斯企業，企望向港人展示俄羅斯美麗嘅一面，真窩心。

http：//tongtong-hkdn.blogspot.com/