美債評級跌 股民喊救命 2011-08-09

新報
B03  |   新報財經  |   中環物語  |   By 糖糖     2011-08-09

美債評級跌 股民喊救命    

救命呀！有無搞錯呀！搞咩呀！呢兩句係糖糖分別幫股民同中國喊出嚟嘅心底話。個股市需要力守二萬點關口，但究竟可以守得幾耐，無人識答，面對股票組合不斷貶值，股民們都只能喊出一句救命。

另一方面，中國揸住美國國債成大批貨，見到美國搞成咁，絕對有資格講句「有無搞錯呀，搞咩呀！」，君不見新華社亦再次出文章，叫美國反省。

發行第三批人幣國債

雖然有評論認為中國今次唔會再好次2008年咁出手做白武士，但係中美喺國際上嘅地位難免會有變動，財爺認為呢個係人民幣走出去嘅絕佳時機。

碰巧財政部將會喺8月22日嚟香港發行第三批人民幣國債，今次發行量超過前兩次，有成200億元人民幣國債，糖糖相信喺呢個7國咁亂嘅時期，今次人債應該會更吸引投資者眼球。

噚日財政部金融司司長孫曉霞、財經事務及庫務局局長梁鳳儀、金管局助理總裁朱立翹，同埋中央政府駐港聯絡辦公室、證監會，以及嚟自銀行、證券基金，以及保險等機構200名代表參加咗今次推介會。

國務院高官來港

唔好以為咁就好大陣仗，好戲在後頭。糖糖收到風，為咗隆重其事，喺下星期人民幣國債發行儀式上，將會有國務院級別嘅中國政府官員到港參加今次歷來最大規模人幣國債發行儀式。

唔單止咁，聽講財政部官員、央行官員，以及5大國有銀行嘅董事長或者行長都會出值。有分析認為，今次總動員好明顯係用行動嚟力挺人民幣國際化。

http://tongtong-hkdn.blogspot.com/



文章編號: 201108090330264