李寧購股權激勵高管 2011-07-19

李寧購股權激勵高管

●廿一世紀者值錢係乜吖？就係人材。李寧（2331）宣布，為咗長期激勵同保留優秀人才，將僱員利益同本公司及其股東嘅整體利益看齊，所以董事會決定授出購股權同股份獎勵。 日前就向公司8個董事，授出可供認購合共六百六十多萬股公司股本中，每股面值0.1港元嘅普通股購股權，當中包括咗CEO張志勇、CFO鐘奕祺等等。另外，就向72位管理人員，授予一百六十多萬股獎勵股份，佔公司已發行股本約0.16%。 咁咪好囉，希望啲董事同管理人員，大家開心完之後畀心機做好間公司，賺大錢，等班股民都開心畀埋一份吖嘛。 德國人用英語講解 ● 每逢同啲銀行大班講開香港嘅優勢，其中一樣一定會提到嘅就係香港有語文優勢，懂得兩文三語。無錯，香港人普遍中又得、英又得，連普通話都講得兩嘴，不過， 呢樣優勢唔係天生㗎，都要靠大家後天努力先得。噚日德意志銀行搞咗個記者會，講吓人民幣離岸市場，主講者係德意志亞洲區地方貨幣信貸交易主管Vishal Goenka。 Goenka全程用英語講解，當中佢提到隨着亞洲地區嘅加息周期接近尾聲，從而帶動孳息率回落。點知糖糖睇幾個網嘅即時新聞，發覺大家不約而同引述Goenka說話指，會帶動孳息率上升。糖糖心諗，可能因為當時Goenka說話較快，而且非純正英語口音，所以令在場部份行家誤會，好彩後尾德意志公關都發現唔對路，於是大家先出聲名更正番。 所以話，做呢行真係少啲信心同定力都唔得，否則好容易會受大圍影響，繼而懷疑自己，最後寫錯資料都未定。 http://tongtong-hkdn.blogspot.com/