李寧揚威倫敦奧運 2011-07-27

新報
B03  |   新報財經  |   中環物語  |   By 糖糖     2011-07-27

李寧揚威倫敦奧運   

●出年就係倫敦奧運嘅大日子，噚日喺倫敦正式啓動咗2012倫敦奧運會倒數1周年儀式。李寧（2331）集團主席李寧，同埋部份集團簽約嘅運動員都有出席，因乜咁威威呢？原來李寧向洛桑奧林匹克博物館捐贈，所以獲國際奧委會主席羅格邀請出席。

羅格都好識做，話李寧係歷史上第一位通過自己公司向奧林匹克博物館捐贈嘅奧運冠軍，賺到李寧天上有地下無咁濟，仲話佢喺運動同商界領域都同樣出色，可以啓發所有奧運選手咁話。

奧巴馬發最後通牒

●8月2日之期好快就到，即係意味住美債面臨違約嘅危機越嚟越高，所以難怪美國總統奧巴馬依家嘅狀態就好似熱鍋上嘅螞蟻咁。好多評論家同分析員都預期，兩黨到依家都未傾掂數，純屬政治爭鬥，相信做完一場大龍鳳後，最終都會達成共識，上調美債上限，避過違約。

為咗呢單嘢，奧巴馬真係扭盡六壬，一方面既動之以情，另一方面以厲聲斥責。佢喺第七次全國電視講話中，話民主共和兩黨喺解決債務同赤字方面係責無旁貸，若因債務同赤字之爭造成美國債務違約，係實屬於「輕率同不負責任」之舉。

違約將會導致信貸評級被調降，到時利率將飆升會為美國人帶嚟沉重負擔。糖糖覺得奧巴馬先小人後君子是啱嘅，正所謂提就提咗你哋班友，到時有乜後果就咪怪佢喇。

鐵概股價返唔到家鄉

●除咗美債問題，相信呢兩日最熱門話題就係高鐵喇。糖糖見到呢單新聞都無語，災難除咗對死傷家屬造成極大打擊同悲痛，亦令一眾之前熱炒高鐵概念股嘅股民喊得一句句。

據糖糖所知，金融海嘯之前，好多銀行大戶都透過Accumulator方式收集高鐵概念股，就好似糖糖有個朋友咁，喺723出事後，即刻打電話嗌救命，話以為當年捱得過金融海嘯一役，貴價接晒啲貨，慢慢等個市好返，咁就有望返家鄉，點知幾年後，唔單止仲未返到家鄉，依家仲要搞單咁嘅嘢，真係心都灰晒。

http://tongtong-hkdn.blogspot.com/


文章編號: 201107270330311