梁高美懿傳授成功秘笈 2011-07-26

新報
B03  |   新報財經  |   中環物語  |   By 糖糖     2011-07-26

梁高美懿傳授成功秘笈    

●恒生（0011）CEO梁高美懿上個禮拜出席咗第七屆香港青少年軍事夏令營，擔任德育講座講者，將自己喺銀行界打滾30年嘅人生經驗同班細路分享，袋錢入佢哋個袋。

話明係軍事夏令營，啲細路喺出席德育講座時，都全副武裝，着住件迷彩服裝好不威風。而心細如塵嘅梁太，為咗襯番大會主題，於是着咗件MISSONI嘅圖案外衣襯一襯，認真有品味。

細路豎高耳仔聽

唔好以為啲銀行大班講嘢一定悶到班細路瞓着喎，梁太喺分享會上，教授咗4大秘笈做傍身招數，包括羅漢拳、鐵頭功、內功心法同大力金剛腿，搞到班細路個個豎高耳仔聽。

梁太話，無論做邊行，都要識得將羅漢拳嘅精髓運用出嚟，就係「與人合作」喇。羅漢拳係根據18位唔同性格、喜好嘅羅漢組成拳術，僧人風格不一，特點都唔一樣，就好似環繞自己身邊嘅人一樣，所以一定要懂得團體力量，識得同人相處， 集合各人所長，達到雙贏效果。

而鐵頭功即係要強化頭腦，自我增值。梁太話同學仔要多啲學習其他知識增值，就好似識得鐵頭功嘅僧人一樣，喺比武時唔單止識用手腳，連頂頭鎚都識，咁樣贏面會大好多。

好似梁太當年咁，中五會考放暑假，佢無去行街唱K，反而讀咗恒生嘅「銀行業務初級進修班」，結果就埋下以銀行業為終身事業嘅伏線，即使梁太嘅爸爸同媽咪反對，想佢讀醫，佢都堅持己見say no。

學藝師傅唔怕多

至於第三招「內力心法」，梁太話當中包括咗「用心」、「決心」、「耐心」、「虛心」同「恒心」，其中梁太話，佢入行無耐就遇到啓蒙老師蒲偉士，雖然佢係滙控前主席，佢知道凈係追隨一個師傅係唔夠嘅，所以亦都不斷向唔同層面嘅人偷師學藝。

糖糖聽完之後絕對佩服梁太，亦都如佢最後同班細路講嘅說話，佢話人分三類：一類係成大業，能帶領自己同別人邁向成功；第二類人永遠做旁觀者，齋羨妒人，自己唔努力；最後就係一無所知嘅人，連咩係成功都唔知。好明顯，梁太就係第一類人。

http://tongtong-hkdn.blogspot.com/




糖糖