B03 | 新報財經 | 中環物語 | By 糖糖 2011-07-28
強積金好唔好有排拗
‧強積金成立10年就畀人鬧足10年,糖糖班街坊街里圍埋開雀局時,耐不耐都會傾到MPF呢個問題,不過大家唔係就投資組合交流意見,反而係諗下有無計仔可以早啲攞返筆供款,由此可以睇到,好多市民都唔相信MPF呢家嘢。梗係啦,每個月出糧出少咗幾百蚊,要到幾十年退休之後先至可以攞得返,到時啲銀紙都貶值晒喇,況且一個唔好彩,俾瑪雅人預言中咗,出年地球就玩完,真係浪費晒啲儲蓄。
評價好壞言之尚早
今年係MPF推出10周年,積金局出咗一本10周年特刊,以「一起成長的故事」為題,記錄MPF制度發展。積金局行政總監陳唐芷青喺本特刊上話,出呢本特刊並唔係要慶祝啲乜嘢驕人成績,因為MPF呢個退休制度,起碼要三、四十年先至可以評價好壞,若果依家就斷言成敗,未免係早咗啲。
換句話講,即係叫大家唔好咁快為MPF下好壞嘅定論,過多二、三十年先算呢筆帳都未遲。睇返啲數字,截至去年底止,所有強積金計劃嘅淨資產值,有成3,654億元,遠遠高於過去10年強積金計劃嘅實際供款總額2,775億元,暫時嚟講都係合格以上。
收費仍然有水位減
首任主席李業廣話,回想當年MPF喺2000年推出前,有大量前期工作要做,好似既要設置完善嘅資訊管理系統,又要確保系統運作正常,加上當時要兼顧埋聯交所大規模嘅重組工作,所以嗰段日子充滿挑戰。至於前主席范鴻齡,雖然只係做咗積金局主席短短兩年,但係已經好自豪同開心。佢仲話,有一次搭電梯,有個男人走埋嚟多謝佢,因為強積金減費。
講開減收費,呢個真係俾市民嘈足10年,糖糖都相信仲有好多水位可以減價,希望積金局喺呢方面再做多啲工夫,期望下一個10年嘅表現。
http://tongtong-hkdn.blogspot.com/
文章編號: 201107280330103
沒有留言:
發佈留言