大劉食拉麵 記者要肅靜 2011-07-15

新報
B03  |   新報財經  |   中環物語  |   By 糖糖     2011-07-15

大劉食拉麵 記者要肅靜    

‧灣仔福臨門係富豪飯堂人所共知，每次糖糖經過，都會例牌見到門口泊咗幾部靚車，同埋企咗幾個保鑣。而城中富豪之中，大劉出晒名係常客，幾乎日日都喺「飯堂」開餐，不過聽啲行家講，大劉似乎轉咗口味，唔食唐餐改食日本拉麵。話說日本連鎖式拉麵店一風堂赤丸拉麵日前登陸香港，噚日邀請咗一批傳媒到場試食採訪，大約10個記者到場後，竟被拉麵店「勸喻」要安靜啲，事關大劉同埋佢嘅家人正喺咫尺之隔嘅貴賓室歎緊拉麵。在場行家唔單止被勸喻要安靜，而且仲被勸喻唔好寫呢單消息出嚟。

有在場行家好不屑咁話，間拉麵店喺老尖新港中心開業，而新港正正就係華置（0127）嘅出租投資物業，梗係怕咗大老闆啦！

不過，糖糖就有另一番嘅睇法喎，先唔理大劉有無刻意行駛佢嘅「富豪特權」，若果從一間日本人開嘅拉麵店去諗，糖糖又覺得威喎。事關日本人一向都被外界稱讚做事認真有原則，做起事上嚟，話之你係老子天皇都無面畀，?依家竟然要賣大劉嘅賬，連大劉都未出聲，就先叫記者安靜唔好騷擾貴賓。

冼博德話上國際板

‧渣打集團（2888）嘅大粒佬呢幾日齊齊雲集廣州，是關渣打贊助咗英超球隊利物浦去廣州同中國球隊日之泉打比賽，所以一班渣打高層，好似總裁冼博德、大中華區主席曾璟璇、渣打中國首席執行總裁兼董事會常務副主席林清德等等都悉數出席。

冼博德仲話，渣打有意喺上海推出國際板後，將謀求上市，咦！唔通渣打又想加入戰圈，爭做首家國際板上市嘅公司？

http://tongtong-hkdn.blogspot.com/