傳施永青買起成報 2011-07-14

新報
B04  |   新報財經  |   中環物語  |   By 糖糖  2011-07-14

傳施永青買起成報 
 
●從來辦報都唔係容易嘅事。錢，燒得最快，卻賺得最苦。不過，世事往往好玄妙，偏偏就有人辭官歸故里，有人漏夜趕科場。之唔係講緊成報囉。

成報老闆楊家誠流年不利，有官非纏身，上星期成報發生大海嘯，一夜間炒咗三分之一人手，搞到人心惶惶。不論係倖存者定係被Out者，大部份行家呢個星期不約而同急急揾定後路，其中更有唔少行家上來敝報投誠。無他嘅，大家都係想食番餐安樂茶飯，好等唔使日日擔驚受怕，求神問卜到底幾時輪到自己收大信封啫。

糖糖收到風，楊家誠佢對成報已經意興闌珊，諗住將成報呢個有成七十幾年嘅金漆招牌，以好相宜嘅價錢，賣俾有心人，而呢個有心人，就係辦報辦上癮嘅中原集團董事施永青喇。施永青佢雖然已經搞份咗免費報，不過似乎仲未夠喉，對呢行情有獨鍾喎。



消息人士同糖糖講，話個放盤價非常相宜，而且雙方已經傾到七七八八嘅階段，若果真係成事，相信成報嘅行家們可以放鬆口氣啦。




評級機構亂出報告

●以前啲評級機構好有江湖地位，佢哋唔會立亂出報告，所以每次都好有份量，不過近呢一年嚟，啲國際評級機構3日唔埋兩日就出一份報告，而且份份都好似唯恐天下不亂咁，至於有乜居心糖糖就不宜猜測喇。不過，個市就畀佢哋搞到陀陀轉，無晒方向。糖糖就認為，無論係評級機構報告又好、大行報告都好，同樣要有道德，絕對唔可以為出報告而寫囉。

http://tongtong-hkdn.blogspot.com/