港格「記者與狗不得入內」? 2011-05-13

新報 B04  |   新報中國金融  |   中環物語  |   By 糖糖	2011-05-13
港格「記者與狗不得入內」?
●離譜！噚日一班傳媒喺香港5星 級酒店港島香格里拉發生疑似被禁錮事件！事緣中信泰富（0267）昨喺港格舉行股東會，一眾財記梗係要到場做採訪，聽下班中信泰富小股東有乜嘢訴求。股東 會都未開始啫，記者已經被拒諸門外；而且就連登記處1米範圍之內都唔可以接近；附近仲有幾個港格保安人員把關，爭在未掛個牌出嚟寫住「記者與狗不得內 進」！ 老實講，好多公司召開股東會唔見記者都係常有發生的事，一班新聞界朋友最初都不以為然；而且仲以為中信泰富體貼備至，租埋幾米開外嘅「泰山廳」俾新聞媒體等候，唔使企成粒鐘。 點知當記者全部入晒泰山廳之後，事情開始出現始料不及嘅劇變──酒店保安員突然大門一關將記者困喺房內（見圖）。新聞媒體之後以無法留意房外情況為由，同工作人員理論；保安員先至開咗一邊門咁大把。 成粒鐘之後，記者諗住出去睇吓開完會未，點知保安員竟然唔畀記者行出房外，「禁足」喺泰山廳之內；保安員仲意圖再次閂門，落閘放狗咩？ 於是記者又再次同保安員理論起嚟，因為咁樣等於係禁錮記者，罪名可大喇！ 中信泰富公關終於現身，仲同記者講話唔關佢哋事，純粹係酒店單方面安排，因為「泰山廳」唔係佢哋開嘅；為數十幾人嘅記者據理力爭下，最終協調設位等候；保安員拉出圍欄將記者擋喺房門口，製造歷史上最擠迫嘅等候位！事後糖糖打畀港格公關投訴，公關竟然話係基於安全理由，係按「處理一般事情方法」而做！仲話從來都無唔畀記者行出房外喎！對於呢間5星級酒店嘅「安全」作風，糖糖真係不敢苟同！