羅傑斯買中國股票俾子孫 2011-05-19

新報 B03  |   新報財經  |   中環物語  |   By 糖糖
羅傑斯買中國股票俾子孫
●商品大王羅傑斯一直都係中國大好友，經常耐唔耐就出嚟唱好吓我哋祖國嘅經濟，直情可以做得代言人啦！我哋中央領導人，唔知會唔會頒個榮譽市民之類嘅獎俾佢呢。 羅 傑斯最近又話，無論係美國也好、英國也好、希臘也好，或遲或早都會破產，只有中國先至係未來所在，歐美人應該要開始教子子孫孫學中文，好等將來可以嚟中國 「討生活」。羅傑斯唔係淨係識得有口話人無口話自己，佢兩個女已經識得講流利中文。唔單止咁，商品大王仲睇好中國人民幣同股票，佢話只要一有機會就買人民 幣，因為佢相信呢一世美金都無乜運行，所以索性一早幫兩個女喺中國開咗個戶口。 至於股票方面佢講得仲動聽，佢話自己喺世界各地嘅投資，有買 必有賣，惟一只有中國嘅股票係非賣品，咩意思呢？即係話佢無準備要沽晒手持嘅中國股票，而且仲要當係家傳之寶咁流傳俾下一代承傳：「說不定50年、60年 後，我兩個女兒或者孫子、孫女都說，爺爺真的很聰明，買了中國的股票，現在讓我們賺了很多錢。」糖糖覺得羅傑斯直情可以改名做「中國大王」！ 其 實叫得做商品大王，羅傑斯當然睇好商品市場，雖然白銀之前遭逢巨跌，但羅傑斯有咩風浪未見過吖，佢話如果再跌多啲仲好，可以趁機吸納，因為佢始終睇好大宗 商品未來會有多年嘅牛市，要到2017年先至可能出現大泡沫，到時先沽都未遲。佢連投資股票都係抱有呢種心態，話唔知咩股票先叫好，但只要邊種股票跌得 勁，佢就買邊隻。一句到尾，即係要貪平掃貨。咦！話時話，呢個其實都係一般師奶shopping時嘅宗旨嚟架喎。 毛裕民收入高過老總 ● 好多人以為喺間公司做得越高級就越揾得多錢，其實係錯嘅！好似建行（0939）投資理財總監毛裕民咁，論職級點夠董事長郭樹清勁吖，但佢嚿年稅前盈利就有 成476萬人民幣，反之郭董都係得129萬人民幣望塵莫及。無他嘅，因為毛裕民係負責投資，即係幫公司賺錢嘅功臣。睇返毛總嘅人工呢幾年真係幾何級數咁 跳，佢喺2007年時年薪先得26萬，但2008年已經加到373萬，嚿年開始4字頭，睇嚟要到千萬年薪真係指日可待。