大新谷人壽 搵巨聲出馬 2011-08-04

新報
B03  |   新報財經  |   中環物語  |   By 糖糖     2011-08-04

大新谷人壽 搵巨聲出馬    

踏入業績期，幾間已經公布業績嘅銀行都交得出一份好過市場預期嘅成績表，今日輪到本地薑東亞（0023）公布業績，希望同樣可以令人眼前一亮啦。

屬大新金融集團（0440）嘅大新人壽，近年好積極進取，為咗優化品牌形象而扭盡六壬，先係請咗人氣王《超級巨聲2》嘅林欣彤（Mag）做代言人，突顯佢哋嘅口號「做好就係香港精神」中嘅奮鬥，繼而搵咗「亞洲車神」黃金寶演繹出「不懈」、至於2009年金茶王得主賴旺明就係「堅持」，確係好合香港人口味。大新人壽今次再下一城，揾阿Mag主唱由林夕填詞、倫永亮作曲嘅大新人壽之歌《非凡》。唔知下星期公布業績嘅大新銀行（2356），可唔可以做到「做好，就係大新精神」呢？

莎莎股價逆市堅挺

噚日個市跌咗四百幾點，搞到好多人都無眼睇，不過莎莎（0178）股價依然堅挺，升咗1.75%，收報6.38元。其實7月嗰時幾間大行已經紛紛發表報告，睇好莎莎，仲上調咗佢目標價至6.5元，予以增持評級，一個月都唔駛，莎莎股價已經差唔多到咗個目標價。

莎莎唔單止喺股價上表現出色，喺年報封面設計上面亦都獲得認同，佢哋2009至10嘅年報，獲美國傳訊專業聯盟，頒咗個亞太區最佳年報設計封面設計，而且仲奪零售界組別白金獎同最高排名之香港入選年報。集團主席及CEO郭少明梗係開心啦，佢話會繼續致力於企業傳訊、投資者關係、以及企業管治領域維持高水準。

http：//tongtong-hkdn.blogspot.com/

糖糖