中信行請小朋友睇戲 2011-08-03

新報
B03  |   新報財經  |   中環物語  |   By 糖糖     2011-08-03

中信行請小朋友睇戲    

糖糖近年每日打開郵件，都會收到好多企業資訊，當中有唔少係關於行善捐獻嘅新聞稿，絕對係好事嚟架。

以前啲人話做善事係唔應該俾人知，不過糖糖就覺得，姑勿論一間企業行善係真心幫人定做宣傳都好，都起碼可以幫到有需要嘅人。而且仲可以喺潛移默化下，感染更多同行齊齊行善，確係一舉兩得。

好似中信銀行國際，日前就夥拍基督教勵行會舉辦電影同樂日。46位嚟自基督教勵行會嘅小朋友，獲邀睇3D版嘅《功夫熊貓2》，一邊睇一邊飲汽水同爆谷，事後仲有得食自助餐同獲贈文具套裝，班小朋友過咗一個輕鬆愉快嘅晏晝。

四叔捐助250位學生

而四叔兩位公子鍾意做善事係人都知，今次輪到剛獲得麟兒嘅李家誠，佢為咗減輕低收入家庭喺子女書簿費問題上嘅苦況，於是用咗66萬，向250位品學兼優、嚟自低收入嘅家庭，送上新學年全套課本。

計糖糖話齋，李家誠不如索性搞多瓣生意，自己做埋書商嘅角色，唔會每年喺咁易掉動啲書本嘅內容次序，就當新版本，兼且決不無理動軏加價，咁咪可以徹底啲解決低收入家庭每年面對子女高昂書薄費嘅問題囉。

社會責任包唔包裁員

講開做善事，其實?家好多大小企業都有做緊，外國叫呢啲做企業社會責任，而且好多公司往往有專屬嘅部門去做。而行善只係企業社會責任其中一個組成部份，舉例說一間血汗工廠一方面大量聘請童工、一日做20個鐘、為咗慳成本用大量大害材料去生產，對環境做成污染，呢啲就係屬於無企業社會責任。

咦，唔知獅子銀行環球大裁員3萬人，當中包唔包括佢哋企業社會責任嘅部門呢？

http：//tongtong-hkdn.blogspot.com/

文章編號: 201108030330229