現代教育股號獎勵學生 2011-07-06

新報
B04  |   新報財經  |   中環物語  |   By 糖糖  2011-07-06

現代教育股號獎勵學生

 ●現代教育（1082）星期一剛剛喺主板上市，呢間公司嘅客戶就係廣大嘅學生哥喇，為咗報答呢班老闆，現代教育喺Facebook上宣布，只要現有學生身份證號碼有1、0、8、2其中一個數字，並喺fb上留言，講下對現代教育上市後嘅期望，講得最好嗰10位同學仔，就可以獲免費獲得Philips電子相架與眾同樂。

如果係一般投資者，梗係希望上市後股價可以好似摩天大廈咁升到高一高啦，不過由於今次對象係學生哥，糖糖見到啲學生留言，大部份都係話希望現代教育最好減學費，唔好收咁貴，有啲就話千其唔好再加學費。哈哈，不過如果現代教育真係減學費，到時班小股東又唔肯過你啫！


渣打推介人幣戶口

●渣打銀行個「My Dream Account」一向都好受歡迎，無它嘅，因為佢哋一路都同迪士尼合作，送限量版迎新禮物。而為咗與時並進，佢哋宣布推出「My Dream Account」人民幣儲蓄戶口，希望戶口數目同存款可以喺未來1年攞到好成績。


梗係啦，人民幣匯率由嚿年6月到今年6月，足足升值咗4.7%，呢個人仔「My Dream Account」戶口，不單可以有高啲利息回報，而且仲可以食住條人民幣升值概念，幾好呀。咦，中國好友商品大王羅傑斯一早叫啲仔女學普通話、投資人民幣，渣打可以打下羅傑斯主意，令佢幫仔女喺渣打開番個人仔「My Dream Account」喎。


意馬灰太郎受歡迎

●噚日意馬（0585）開記者會，揾咗主角喜羊羊同灰太郎出嚟娛賓，一班女記者開完個記者會後，即係全部撲晒去灰太郎度影合照，相反主角喜羊羊就孤零零咁企埋一邊，不知點算好。
梗係啦，全世界個女仔都想揾個灰太郎咁性格嘅男朋友啦，睇嚟意馬可以特別開多一條line係sell灰太郎喎！


http://tongtong-hkdn.blogspot.com/