喜尚搞上市 米芝蓮係賣點 2011-07-05

新報
B03  |   新報財經  |   中環物語  |   By 糖糖  2011-07-05
喜尚搞上市 米芝蓮係賣點 

●喜尚控股（8179）噚日搞記者會，介紹公司打算喺創業板上市嘅內容。過江龍唐宮（1181）喺香港上市係威係勢，唔知同樣做飲食業嘅本地品牌喜尚，可唔可以食住個勢呢？
話說喜尚今次打正旗號以中式酒樓專攻本地市場，集資額一半都喺用嚟開間擺到120圍、坐到1,500人嘅「紅爵御宴」。公司主席黃君武仲喺記者會上大讚特讚其「場面大、無柱、樓底高、招待好」4大優點，聽到黃主席咁講真係忍唔住笑咗。
酒樓未起好，可唔可以做到以上4大優點，糖糖暫時不作評論，但公司攞過「米芝蓮」美食獎，喺記者會上梗係不忘「Show off」。會上公司特登拎出三道招牌菜，包括「蝦禾米乳香豬」、「香煎蓮藕餅」同「冰淋醬烤骨」等美食好好招待記者們。