B03 | 新報財經 | 中環物語 | By 糖糖 2011-06-14
洪丕正帶成隊人做義工
●香港人做善事一向不遺餘力，有錢出錢、有力出力。為了鼓勵自己嘅員工參與慈善活動，渣打每年都畀自己嘅員工有3日嘅有薪義工假期。好似噚日咁，渣打香港行政總裁洪丕正—阿Ben，就拉大隊齊哇哇去探一班視障學生，同佢哋油壁畫，做陶瓷磚牆。
唔好以為阿Ben唔返工就好輕鬆喎，實情喺佢畫咗成朝，仲攰過坐辦公室啊！一邊畫，仲要一邊教啲學生，同佢哋傾吓偈，講吓百科知識添。糖糖仲偷聽到，阿Ben教小朋友認識邊個係畢加索啊！
烈日之下係咁油幾個鐘，阿Ben先發覺油壁畫一啲都唔容易。現場嘅工作人員話佢畫一隻長頸鹿就畫咗3個鐘。身體力行之後，阿Ben叫自己啲員工唔好轉工油灰水吖，唔喺嘅話，做得咁慢，分分鐘連最低工資都擔心攞唔到吖！
全年萬五個服務日
講翻做義工，渣打嘅員工都真喺幾落力，6月喺佢哋嘅「員工義工月」，公司就主動安排超過500個嘅義工服務機會畀同事參加。據佢哋講，渣打有5,000個員工，每人每年有3日嘅假期，加加埋埋全年就有成15,000個義工服務日，真喺可以幫到好多人。
做善事可以幫到人，亦可以幫到自己，其實唔一定要有假期先可以做義工架，只要大家發自內心，多啲關心身邊嘅人，多啲幫助有需要嘅群體都算係做善事啦！咁你仲唔快啲坐言起行？
http://tongtong-hkdn.blogspot.com/
沒有留言:
發佈留言