●好多人都會講過啲嘢唔算數，但作為對社會及國家經濟有舉足輕重作用嘅銀行，講完啲嘢唔算數就唔得喇！好似近呢兩年來，央行對銀行資本充足率提高咗，多家銀行呢頭講完話幾年內都唔融資，但轉個頭就推出融資計劃，內地財新網就專登搞咗個銀行「食言」表，表列咗中國銀行（3988）、建行（0939）、民生、興業同埋浦發銀行嘅「食言」事件表。
中行最叻捉字虱
好似建行咁，3月時張建國先講話「今年唔會再融資」，但係3個月之後，建行喺6月10日就宣布，公司擬發行唔超過800億人民幣次級債券，用於充實公司資本。
不過你有張良計，佢有過牆梯，銀行喺融資話題上嘅措辭亦越來越謹慎，好似中行咁，今年3月曾話，2012年前都唔會實施股本融資計劃。之但係，次級債係屬於非股權融資，結果中行喺5月，就喺銀行間債券市場公開發唔超過320億人民幣固息次級債。點夠你講吖！
乘客歎冷氣被趕
●3個內地乘客日前被南方航空（1055）趕落機事件，在內地牽起波瀾。話說有3個乘客登機之後想臨時掉位，坐前啲，結果被機長以飛行安全為由報警，被請落機之餘，之後仲要被一位南航飛機師喺微博講咗句：「同央企，你玩唔起！」結果被傳媒廣泛報導，機長最後仲要寫道歉信添。
糖糖日前出差，都係搭南航，當日由於天雨關係，唔能起飛，結果糖糖同其他乘客被迫喺架機上面呆坐兩粒鐘都未飛得，天公唔做美當然唔怪得南航。
弊就弊在當日喺全機爆滿情況下，南航都唔肯開空調，一機人就咁個個熱到出水，好彩當時投訴，如果唔係分分鐘會出動警察，趕晒我哋落機呀。不過最後喺詢眾要求情況下，好彩最終都開冷氣，但開咗唔夠一陣，機長最後決定叫全機人落機等。
http://tongtong-hkdn.blogspot.com/
沒有留言:
發佈留言