花錢買快樂 專家教秘笈 2011-05-17

花錢買快樂 專家教秘笈

● 家係金錢世界，咩都係錢錢錢，不過，有人認為錢買唔到快樂，原來此言差矣。根據消費心理學期刊發表嘅一份報告話齋：只係大多數人唔識點洗錢。 有幾位世界級學者為花錢買快樂嘅人，揾到6大秘笈： 1、花錢去買經歷而唔係去Shopping。皆因你同我往往係會通過回憶去重温以前嘅活動，但係對住新買返嚟嘅戰利品好快就會貪新忙舊。 2、助人為已。出發點係要希望從幫助別人而令到自己開心，呢一樣糖糖就唔係好敢苟同，因為當幫人係為咗自己開心，咁好似自私咗啲。 3、買靚內衣，唔好買貴車名錶影音。研究話如果Shopping買嘢會好開心，咁就索性買啲小物品，方便得嚟仲可以不停咁買，好過買貴嘢，因為可以買貴嘢嘅次數一定少。當然，如果你老竇係李嘉誠或李家誠就另計啦！ 4、堅持用現金Shopping。碌卡買嘢壞處多，除咗係先洗未來錢，除有機會搞到債台高築之外，原來都同快樂有關。當你儲備一筆錢然後去買嘢，個快感會俾你碌卡買嘢為大；當你碌卡買嘢時，個潛意識會憂慮到，唔知月底夠唔夠錢找卡數，咁你個快樂就會打咗折扣。 5、唔好貪一時之快而買咗啲手段長嘅嘢。例如話，當你好恨有間湖邊小屋，結果不顧一切去買咗間屋後，原來有好多手尾要跟，例如點樣解決蚊多蟲咬嘅問題。千祈唔好買啲開心1日，但之後364日有排煩嘅東西。 6、 買嘢前不宜左度右度。有啲人喺買相機前，用幾個月去搜集資料，上幾十個討論區問長問短，生怕自己無買到集所有功能於一身嘅相機，結果忽視咗其他更重要嘅東 西，例如喺你個仔仔笑嘅時候，係咪有足夠時間喺佢伸出手指挖鼻孔之前拍到佢個笑臉。其實只要重點關注幾個比較重要嘅功能就可以，記住，無嘢係完美嘅。 快樂無得用錢衡量 糖 糖認為，專家之言未必作準，只宜作參考。例如香港師奶當買隻蛋、買個橙都要驗屍咁驗時，你叫佢唔好咁挑剔，簡直係剝削咗佢嘅快樂！又例如提議唔好買咁多貴 嘢，索性以量取勝，買平嘢，結果咪買埋一屋無謂嘢囉。不過，惟一可以肯定嘅係，快樂本身係唔可以用錢嚟衡量，糖糖擁有嘅快樂，唔一定少過富豪。