李家傑行善助內地貧童 2011-05-16

李家傑行善助內地貧童

●恒基地產（0012）主席李兆基嘅大公子李家傑，上周末晚出席內地「愛佑華夏基金會」嘅一年一度慈善籌款；信佛者果然充滿善心，李家傑相當慷慨，成晚總共捐咗470萬人民幣做善款啊！ 李大公子首先捐出150萬元人民幣，以投得「888888」微博帳號，呢個獨家網址weibo.com/888888認真昂貴，不過，百零萬對大公子嚟講，只是九牛一毛，而且今次為咗做善事，多多錢都無計啦！ 大公子投得心頭好之後，就馬上係微博留言，叫大家唔好誤會，呢150萬買號錢，喺用來救助幾十個孩子嘅生命；佢仲問：天下仲有比呢個更有意義的事情可做咩？ 另外，內地幾個網絡巨頭都有同場出現啊，好似騰訊（0700）嘅總裁馬化騰、新浪CEO兼總裁曹國偉、仲有內地巨人網絡董事長兼CEO史玉柱。哇，大家都喺內地網絡界的巨頭，鬥到你死我活，原來連做慈善都鬥一餐。 話說曹國偉拿出「6條8」網址出來做慈善之後，史玉柱亦不甘後人，將個人嘅網絡遊戲中嘅名字「史玉柱」拿出嚟拍賣；而馬化騰呢，就捐出一件雲南吉祥刺繡服。哎，為了公平起見，李公子冇理由厚此薄彼，於是佢再次發揮無限嘅善心，分別以220萬元及100萬元投得以上兩樣嘢！ 曹國偉十分識做，當網址獲得李公子投得後，便即場為李公子影番張相留念，並上傳至自身嘅微博上，畀「童鞋」（粉絲）見吓。 李公子真喺好有善心，佢亦強調本人唔係亂使錢，而係真心希望捐出嚟嘅470萬，可以救番200個以上貧苦孩子嘅生命。 同一場合上，騰訊掌門人馬化騰同死對頭曹國偉齊齊上台，兩個從網上鬥到台上，不過今次唔係拗自己網絡有幾多用戶，而喺齊齊做慈善。馬化騰作為呢個基金會嘅「舊人」，為死對頭曹國偉頒發新理事任命證書，以後就攜手齊齊做善事！