陶冬計過條數唔買樓 2011-06-21

新報
B03  |   新報財經  |   中環物語  |   By 糖糖     2011-06-21


陶冬計過條數唔買樓    

●瑞信董事總經理兼亞洲區首席分析師陶冬（圓圖）係財經紅人，尤受傳媒鍾愛，幾乎三日唔埋兩日，就會見到陶冬做封面嘅財經雜誌出街，無他嘅，陶冬之所以做到「傳媒之友」，全因佢夠親民，打親電話畀佢都有問必答。所以噚日陶冬開記者會，都座無虛席，好多行家都專登去捧場。

呢輪大家都喺度講緊樓市問題，尤其「復建居屋」更係今期當Hit話題，在場記者當然捉住陶冬問下佢有乜高見啦，例如對內地嘅樓市嘅後市點睇。查實陶冬之前已經喺博客上面寫過，話唔會喺香港買樓，原來內地都一樣，佢話自己都唔會喺內地買樓。

美國15萬美金起4幢樓

佢同大家分享了個故事去解釋，話說佢有個朋友用咗15萬美金，喺美國佛羅里達買了塊地，足足可以起4幢樓，但他就話，15萬美金，可能喺上海連個廁所都買唔到，去海南都可能最多買到兩個廁所，咁買嚟做乜呢？！家內地樓價越嚟越貴，陶冬認為，歸根究柢都係因為之前放水放得太過多，但係佢又唔想用泡沫來形容喎，因為房價喺唔同嘅地方都有唔同標準。

咁香港又點睇呢？他就話香港處於聯儲局同人民銀行政策兩個漩渦嘅中心，無屬於自己嘅貨幣政策，加上又受到內地嘅影響，他怕遲吓通脹繼續升，低收入階層嘅收入都不及租金嘅升勢。他仲建議，政府應該未雨綢繆，多啲幫助弱小群體咁話。糖糖當然舉腳贊成啦，事關中國人傳統有重視瓦遮頭問題，希望「蝸居」問題唔好喺香港迅速蔓延開去。

曾氏兄弟睇好礦業

●我哋特首曾蔭權噚日喺西澳洲工商總會嘅午餐會上致辭，指香港市場流動性高，公司估值吸引，係西澳洲資源公司籌集資金嘅理想平台。事有湊巧，曾生細佬新創建（0659）曾蔭培，噚日就為新世界發展（0017）旗下資源公司—新礦資源嘅上市前記者會主持大局。雖然新礦資源嘅鐵礦係嚟自內地河北，而唔係西澳，不過好明顯，特首一家都好睇好礦業前景喎。