內地年薪1067萬人幣 平保張子欣成打工皇帝 2011-05-06

新報 B03  |   新報財經  |   中環物語  |   By 糖糖	2011-05-06
內地年薪1067萬人幣 平保張子欣成打工皇帝
●傳聞今年打工皇帝會大執位，雄霸咗榜首多年嘅和黃（0013）大班霍建寧今年可能終於要退位讓賢，結果係點好快就會揭曉。至於A股市場嚿年嘅打工皇帝就出咗爐喇，結果由平保執行董事兼總經理張子欣，以稅前1,067.18萬人民幣年薪稱王。 張子欣做咗打工皇帝梗係威威啦，不過可能只係威1年咁大把，事關張總平保嘅總經理任期喺今年3月18日已經完咗，但之後會繼續留任做董事。若以行業區分， 喺A股市場中，絕對係保險業嘅天下。據2010年年報資料顯示，保險業高管平均年薪有3,880.13萬，足足係排包尾嘅農機裝置業的高管薪酬的40倍之 多！而銀行同證券業就分別獲排亞軍同季軍。 至於按公司嚟計，廣發證券以高管年度總報酬額7,209.33萬元位列榜首，其高管中有半數年薪超過500萬元，難怪咁多大學生一畢業就搶住要入金融業啦。 恒生關穎嫺焗曲奇行善 ●一年一度母親節又嚟喇，糖糖作為一個孝順女，已經一早買定禮物，訂定蛋糕寫定心意卡送畀糖媽。雖然話日日都係母親節，只不過借呢一日表露下對媽咪心意，氹佢開心都係應該。 況且盡孝心又唔一定要大灑金錢，好似恒生銀行信用卡及無抵押信貸業務主管關穎嫺，就同恒生義工變身烘焙大師，炮製曲奇餅，喺母親節期間加入曲奇義賣行列，支持「延續幸福──助農村媽媽脫盲」活動，收益會用於開辦婦女掃盲班嘅經費。 糖糖覺得好有意義，因為可以將對母親孝心傳揚開去，將幸福延續到內地文盲嘅母親。