B03 | 新報財經 | 中環物語 | By 糖糖 2011-06-22
利子厚話 樓市少少泡沫
噚日係港交所（0388）11周年誌慶，港交所行政總裁李小加帶領全體董事局成員連同一眾嘉賓，喺金鐘某酒店搞咗個慶祝酒會，相信唔駛糖糖點形容，大家都已經想像得到場面有幾咁墟冚。
大粒佬賀港交所
在場撞口撞面都係財金界嘅大粒佬，糖糖睇到兩眼發光，因為當中有唔少「稀客」都有出現，絕對係把握機會訪問好時機。好可惜現場有好多「實Q」喺度維持秩序，區分咗一條記者與嘉賓嘅楚河漢界，糖糖有幾次想闖關同嘉賓傾下計、交換張咭片都被制止，惟有靜候時機出動。
當財爺曾俊華上台致謝辭後，成班記者終於可以混水摸魚越過禁區，同在場嘉賓傾計。糖糖見到身兼港交所董事及Oxer Limited董事利子厚嘅蹤影，第一時間捉住Michael問下佢對樓市點睇，佢亦都好慷慨咁同糖糖分享自己嘅見解。
佢話依家個樓市係有少少泡沫，短線投資者一定要特別小心。至於政府呢輪頻頻出招，加上息口又上升，個樓市泡沫會唔會細咗呢？Michael話會起到少少冷卻樓市作用，佢話希望有助壓抑到部份炒風咁話。
提到息口呢家嘢，糖糖離遠見到資深銀行大班陳子政，同渣打洪丕正喺度咬耳仔，於是走埋去入下，問係咁喺度講銀行息口呀？KC笑笑口咁話只係傾閒計，無特別，糖糖打蛇隨棍上問KC幾時得閒同後輩分享下經驗，點知KC好客氣咁話自己已經係退休人士，應該揾啲後生啲嘅大班來分享。計糖糖話，KC喺銀行界地位崇高，兼且退而不休，如果唔係寶哥哥都唔會禮聘KC做東亞顧問啦。
陳家強滾水淥腳
轉個頭，糖糖見到財經事務及庫務局局長陳家強，諗住走上前問下局長日前四周圍咁出訪，有乜趣事，點知傾唔夠一句，就滾水淥腳要走人，局長臨走前見到糖糖一臉無奈，於是就向糖糖講咗句﹕「我唔係耍你呀，真係趕住要去下一場呀。」收到喇，局長。
http：//tongtong-hkdn.blogspot.com/
沒有留言:
發佈留言