●香港中資證券協會噚日喺港麗酒店舉行咗個4周年慶祝酒會暨第三屆董事會就職典禮，現場有多位行內大粒佬、話事人都有俾面出席，好似中央駐港聯絡辦公室秘書長楊建平、中國企業協會會長張學武、海通CEP林涌、東泰主席李君豪等等。
 |
| ■陳家強簽咗個大名喺牛頭 位置，顯眼又好意頭。 |
為怕招呼不周，身為主人家嘅香港中資證券業協會永遠名譽會長謝湧海自然熱情招待，不過個會場有兩個完全唔同嘅入口，搞到謝會長兩頭騰出去迎賓，忙到連水都無時間飲。最弊就係其中一個入口要行一條長樓梯，糖糖眼見謝會長跑樓梯來來回回幾十次，謝會長笑笑口咁同糖糖講，話「腿都痠」，不過糖糖眼見謝會長面不紅、氣不喘，睇嚟佢認真好腳骨力。
講開畀面，港交所行政總裁李小加認真畀足面，佢噚日中午出席咗中國日報亞洲領袖圓桌論壇，去咗成3粒鐘，之後黃昏就匆匆趕過嚟香港中資證券協會個慶祝酒會。 李小加差啲入錯廁所
糖糖無講大話，李小加一嚟到同謝會長影咗幾張合照後，就即刻急步衝入洗手間，可能真係太趕，佢一支箭咁就走入女廁，說時遲那時快，好彩俾公關姐姐截停，話「男廁喺隔籬呀李先」，先至令李小加避開尷尬一幕。作為主禮嘉賓嘅佢，喺致謝詞時，一嚟就連續講咗5次「多謝」，多謝中資證券協會咁話，仲唔畀足面！
大會喺會堂入口處擺咗隻大金牛，幾乎每位到場嘅嘉賓都有喺隻大金牛上簽名，財經事務及庫務局局長陳家強就獨佔牛頭，簽咗個大名喺牛頭位置，顯眼又好意頭。事後糖糖問謝會長點樣安置呢隻大金牛呢？謝會長冷不聲防有此一問，先是一怔，隨即同糖糖講，話呢隻簽名牛仲未諗到放喺邊，但就肯定會有地方安置佢咁話。
水舞間贏CIO 100大獎
●新濠博亞經營嘅「水舞間」搞到全城牽起撲飛熱潮，真係一票難求。日前新濠博亞娛樂就奪得2011年CIO 100大獎，呢個獎每年會表揚全球100間喺資訊科技範疇表現出眾嘅企業，而新濠博亞就係惟一獲表揚嘅娛樂及博彩企業。
糖糖
沒有留言:
發佈留言