內銀鼓勵債主提早還錢 2011-06-20

新報
B03  |   新報財經  |   中環物語  |   By 糖糖     2011-06-2


內銀鼓勵債主提早還錢    

●以前銀行水浸，若遇上借貸人提前還樓按，分分鐘要被罰息，不過今時唔同往日，依家內地銀行銀根短缺，非但提前還錢唔駛畀違約金，而且仲好受銀行歡迎。

隨到隨還免違約金

據糖糖所知，近日內地有唔少「房奴」都紛紛收到銀行嘅SMS，內容係鼓勵你提早還錢：「尊敬客戶：如需辦理個人貸款提前還款業務無需預約，隨到隨還，可免違約金。」云云。

梗係啦，今年以嚟央行每一個月就上調1次存款準備金，最新嗰次喺6月14日，上調咗0.5%，已經係今年以嚟第六次，大型銀行嘅存款準備金率已經去到21.5%嘅歷史新高。至於中小型金融機構都唔嘢小，存款準備金率都高達18%。今次上調之後，有分析員話將凍結資金3,800億人仔，減少咗銀行淨利息收入約50億人仔。

不過，既然話得銀行銀根短缺，啲房奴即使有錢都唔還住啦，因為咁代表咗再問銀行借錢一定會更難，利息又會更高，變咗依家內地啲個人房貸真係「一貸難求」。

合理貸款可抗通脹

●講開借錢，以前上一輩老人家一直覺得爭人錢係醜事，不過依家有理財師就認為，喺通脹形勢咁嚴峻情況下，合理嘅負債其實就係抵抗通脹最佳辦法！以內地5月CPI同比升5.5%為例，如果以4%至5%嘅利率去申請貸款，咁樣呢種合理貸款咪就係有效抗通脹方法囉，既然以前嘅貸款平過依家，咁仲有乜理由要提前還錢呀？

糖糖覺得不無道理，之不過前題係要懂節制，唔好身上有個餘錢就身痕做大花筒，結果爭下周身咭數，咁個如意算盤真係打錯咗喇。

http：//tongtong-hkdn.blogspot.com/