．糖糖好耐都無聽到豪語喇，話說亞洲水泥(0743)噚日開股東會，董事長徐旭東同記者講，話依家公司有幾個併購項目喺度研究緊，記者就問佢計劃預留幾多錢嚟做收購合併，點知徐董笑笑口咁講咗一句﹕「唔...好抱歉，我都好討厭咁講，錢我好多....」雖然佢最終都無講到會用幾多錢做併購，但就已經傳達咗佢大把錢嘅訊息喇！
身兼遠東集團CEO嘅徐旭東，不嬲都係美式作風，口頭禪係「Wonderful」同「Unbelievable」，佢呢句「錢我好多」真係無作大，3月時佢曾經自豪咁講過，話遠東集團經營超過一甲子，市值已經超過370億美金，集團資產達到1.7兆台幣，係台前3大金控集團。」有分析員估計，遠東今年稅前盈利將會增加11%去到1千億台幣！
．全國政協常委郭炳湘係讀工程出身，佢最近仲獲得香港工程師學會資深會員嘅資格，郭炳湘話覺得好榮幸同高興，仲好勉勵年輕人加入工程師行列，為國家同香港作出貢獻添。
郭炳湘老父郭得勝生前好欣賞讀土木工程出身嘅胡應湘，覺得佢好有創作精神，係一個出色建築師，可能係咁潛移默化之下，郭炳湘又去讀土木工程，佢早年係喺英國倫敦大學帝國理工學院土木工程系，讀完學士同碩士之後，就返嚟香港，去咗合和做咗兩年工程師，跟胡應湘學嘢，之後先至番返去新地做家族生意。
‧可能由於係香港藝術節嘅關係，呢幾日有幾場藝術拍賣會同時喺香港舉行，糖糖當然唔會放過任何可以投資嘅機會啦，其中喺灣仔舉行嘅佳士德拍賣會，糖糖至愛就係朱銘嘅"太極"系列喇。不過講起就心傷，仲記得幾十年前，當時朱銘仲未好似依家咁出名，糖糖喺太子大廈裡面一間舖頭，睇中佢一對太極公仔，索價一對14萬，當年嫌貴無買，結果依家同系列同呎吋嘅出品，底價都要成百幾萬啦，真係喊得一句句。
沒有留言:
發佈留言