農行記招「造馬」惹批評

新報 B3 中環 2011-03-31

糖糖

所謂同行如敵國，一間上市公司除咗鬥業績、鬥規模、鬥宣傳外，其實形象都好緊要。好以農行(1288)咁，噚日公布業績，嚿年賺948.73億人民幣，好過市場預期，仲派息5.4分，算係同股東有交待，不過依然惹來一眾財記怨聲載道，何解？箇中原來有段故....

 

出貓也瘋狂

話 說喺Q&A問答環節，公關公司灝天 （Wonderful Sky）竟然「出貓」，除咗預先內定3個記者「做媒」之外，仲要擬定好一系列問題俾「做媒」嘅記者發問，而管理層同翻譯員就 按照一早預備好嘅貓紙見字讀字(有相為証)，成個「做假」過程維持咗大半個鐘！咁樣算唔算係妨礙新聞自由呢？最離譜係，當3個懷疑做媒記者問完問題後，公 關姐姐竟然又用「即時終止記者發布會」呢招，完全剝削咗其他記者發問「真問題」嘅權利，你話班記者唔黑面就假喇！結果當然係不歡而散，聽講部份無癮嘅記者 仲圍埋一齊開咗個會，傾吓係咪應該杯葛呢間公關公司嘅所有活動！糖糖最唔明嘅係，其實份業績都唔係差，何解要咁小家子氣呢？


所謂醜事傳千里，唔駛半個鐘，成個財金公關界同傳媒界都知道爆咗呢單笑料出嚟，灝天財經（Wonderful Sky）公關公司於是急急補鑊，相隔幾個鐘再開多次臨時記者會，今次先「嚟真」，無內定記者、無內定問題，成班記者先至順番條氣，其實班記者都係想做好個採訪啫。
到咗夜晚，公關阿頭親自打俾糖糖「晒冧」，扮演傳媒之友嘅角色，至於內容係點就唔透露太多喇，糖糖不便多講，始終希望凡事留一線，不過糖糖可以拍心口保證，如果你聽到佢地高層say sorry的藉口，包保大家笑到碌地。

–中糧噚日公布業績，一去到就每個記者一人派一張禮券，憑券可以去超市換取中糧出產嘅「金盈稻花香」5公斤大米一包。無辦法啦，呢輪業績期，啲記者會撞期撞到七彩，公關姐姐咪唯有扭盡六壬，希望「搶」到多啲媒體去採訪，爭取「曝光」嘅機會囉。