姚君達或問鼎企業家獎 2011-05-27

新報 B03  |   新報財經  |   中環物語  |   By 糖糖	2011-05-27
姚君達或問鼎企業家獎 ●一年一度嘅安永企業家獎2011中國評選活動又開始喇，今年已經係第六年喺中國搞評選活動，用以表揚中國新一代企業家嘅智慧同精神。無論係糖糖定係讀者，都可以提名身邊嘅優秀企業家，而且所頒發的獎項可包括10大行業類別，包括清潔技術、消費品、新興企業家、生命科學、製造、科技媒體及娛樂、房地產服務及電訊業等。贏出嘅企業家獎中國大獎，仲可以代表中國參加出年喺蒙地卡羅舉行嘅全球企業家頒獎典禮添。 睇番嚿年嘅得獎者，有啲係大家熟悉嘅人物，當中包括前嗰輪日日上娛樂版咁濟嘅台灣女星大S奶奶──俏江南董事長張蘭，同埋城市電訊主席王維基，佢哋分別獲得服務業及電訊業界別嘅企業家獎。 糖糖大 膽咁假設，唔知今年嘅新興企業家獎，會唔會係「七料之王」嘅米蘭站（1150）創辦人兼主席姚君達囊中之物呢？米蘭站暫時係今年嘅「「超購王」、「凍資 王」、「頂頭槌飛王」，以及暗盤「升幅王」、「賺錢王」、首日掛牌「升幅王」、每手「賺錢王」，風頭一時無倆，最重要嘅係，賣二手嘢賣到咁巴閉，佢都算係 打出自己一片新天地，呢種生意模式，連「殼后」朱李月華都畀個Like佢。 《中環物語 》開博 ●另外有個好消息要宣布，我糖糖快將開博喇，之後會將《中環物語 》呢個欄目擺上博客畀大家睇，等大家喺沉悶嘅日常工作之中，都可以「八」到中環秘聞，當友亦都歡迎各位中環友爆料同畀意見，糖糖會無時無刻咁揸住部iPad2，留意住各大小資訊，賜教賜教。