重農行業績記招夠「求其」- 2011-03-29

重農行業績記招夠「求其」

新報 | 2011-03-29   B03| 新報財經| 中環物語| By 糖糖

●去記者會就去得多，但係糖糖噚日就去咗一個趕頭趕命嘅記者會。話說噚日多間銀行公布業績，重慶農商行（3618）係其一。由於係新上市，記者對佢其實了解唔深，所以財經記者對此都不敢怠慢，一早到場部署。

唔知道係咪公關公司灝天金融（Wonderful Sky）擔心到場嘅記者唔夠數，索性連凳都係放得幾十張，搞到班記者到場後連位都唔夠坐，要酒店工作人員嗱嗱臨拖多幾張櫈出嚟。

不過，講到最「騎呢」嘅就係問答環節喇！公關公司皓天金融出動到一位副總經理韓風做問答環節主持，為重農行管理層擋駕。兩位記者問完問題後，韓風出其不以話「由於時間關係，今日嘅記者會到此為止！」

哇！兩個記者問咗5個問題，就咁快結束？唔該唔好同記者玩數字遊戲啦！面對呢個情景，台下於是「噓」聲四起！管理層亦懶得留低，喺公關保護下離開會場，不過公關人數又唔夠，搞到有位管理層被「滯留」會場，勉強解答多一兩條問題。

問題環節一向都係記者會最重要部份，今次個記者會草草收場，真是有失風範，咁樣搞個記者會仲有咩意思呢！事後一眾行家都抱怨話公關公司做得好差，有位行家甚至揶揄話「呢間公司真係以客為先，財記唔該行開一邊」，更有行家形容該行高層「閃縮、迴避、落荒而逃」。

其 實唔係每一間銀行都有咁嘅服務態度嘅，好似另外一間大行建設銀行（0939）就唔同喇。建行儘量滿足記者提問需求，十幾條問題回答得乾脆利落，清清楚楚， 儘管有行家問多了一兩條，建行高層都把握交流機會，一一解答。記者會後，董事長郭樹清仲留喺到，解答未答完嘅問題。嗱，呢啲咪係風範囉！