四叔話大把「水」唔使集資 2011-06-02

四叔話大把「水」唔使集資 

●恨抱男孫恨到出面又出口嘅四叔，今年一次過有4個男孫，真係贏大錢都無咁開心，家宅運一流。之不過事業運就似乎流年唔多吉利，斷斷逐逐都有負面消息傳出，日前因為恒地1106紅利輪（0879）股價唔到58蚊行使價，搞到變廢紙，四叔帳面即蝕咗九億幾，有損佢「亞洲股神」個名。唔單止咁，天匯撻訂事件亦搞到佢頭都痕！

繼嚿年天匯有20個單位撻訂後，最近再有3宗撻訂個案，四叔噚日出席美麗華（0071）股東會，自然被記者圍攻要佢解畫喇，不過薑係越老越辣，三兩下手勢就俾佢講過去，仲話對商譽唔會有影響添。

雖然恒地1106紅利輪最終蝕錢收場，但四叔就唔認自己睇錯市，梗係啦，話晒都挾住「亞洲股神」個名喎，點會認係睇錯市喎。佢話市況偏弱，令到恒地股價低過紅利輪嘅行使價，影響到相關集資計劃，但佢大派定心丸，話集團手頭大把現金，實際影響有限，而暫時無意再集資。

至於對恒指有乜睇法，四叔今次好慷慨咁大開金口，唔似上一次咁唔肯講，佢話港股今年內都會喺23,500點上落，預料整年會喺有關水平嘅10%波幅徘徊，但係就無正面回應會唔會有入市嘅可能。


滙豐見習生演理財話劇

●學生哥、年輕人唔單止係社會未來棟樑，仲係銀行潛在客戶群，越早同班潛在客戶群建立關係絕對係好事。
滙豐當然深明呢個道理，日前滙豐香港區零售銀行及財富管理業務部零售網絡主管韓克強，就同250個學生分享個人同家庭嘅理財經驗。後生仔聽到「理財」皺晒眉，韓克強於是聯同3個管理見習生以話劇形式去表達理財概念。