六叔現身 無綫新主未蒲頭 2011-05-26

新報 B03  |   新報財經  |   中環物語  |   By 糖糖	2011-05-26
六叔現身 無綫新主未蒲頭
●噚日電視廣播（0511）開股東會，一眾行家迫爆場，無他嘅，大家都係想睇下TVB易主之後，新主人會唔會到場，不過無論係「殼王」陳國強定係HTC嘅王雪紅都未見人影，但好彩103歲嘅六叔最後現身，唔駛傳媒空手而回。 六叔老當益壯，精神好好，眼仔碌碌不知幾精靈，但畢竟已經103歲，所以佢今年一改以往步行去股東會嘅慣例，改為坐輪椅到場。糖糖睇真啲，呢張係非一般輪椅，驟眼睇好似一張電動梳化，就好似賭王何鴻燊嗰部一樣，係由汽車坐椅改建而成嘅。唔知啲輪椅生產商係咪應該按照啲富豪嘅需要，設計生產一啲富豪級嘅輪椅呢？糖糖忽發奇想，遲啲會唔會進化到由按摩椅改裝做輪椅呢？ 除咗六叔之外，TVB今次開股東會都幾識得把握時間，完全體諒到傳媒喺時間上嘅緊張。話說一般股東會通常要等完結後，管理層先至會出嚟同記者吹下水，但TVB就利用股東填表投票嘅空檔時間，先行同記者做訪問，做完訪問先至開埋下半場嘅股東會，唔駛記者棟篤企得個「等」字。 出嚟見記者嘅管理層除咗有新聞王電視廣播業務總經理陳志雲之外，仲包括董事及集團總經理李寶安、業務總經理鄭善強同埋國際業務總經理陳碧鏵。 抽中嘉能可散戶蝕本 ●早前傳有多位富豪入股嘅嘉能可（0805），未上市前氣勢何其大，但點知噚日首日掛牌要跌穿招股價收市，搞到糖糖噚日喺中環下午茶時，聽到一班西裝友圍埋喺到搖頭嘆息。無法啦，呢期個市受外圍因素影響喺到尋底，唔知呢啲係咪叫生不逢時呢。不過都唔一定吖，雖然米蘭站（1150）噚日都跌7.7%，創上市新低，但唔好唔記得，米蘭站前日新上市勁升超過六成，仲榮膺4料新股王添。