港股七翻身嚟喇？ 2011-06-27

新報
B03  |   新報財經  |   中環物語  |   By 糖糖     2011-06-27

港股七翻身嚟喇？    

●大市上周終於結束跌勢，而且連日反彈，令到班中環友終於鬆番啖氣，周五周六重拾心情出去蒲。不過，部份新股沽壓不輕，咁代表投資者喺上落市揀股不揀市嘅專業取向。

2011年轉眼又過咗一半，所謂五窮六絕七翻身，若果大反彈確認係一次升浪，固之然人人歡喜，但若然繼續上上落落，下半年嘅成敗關鍵就在於有無眼光可以揀中有驚喜嘅股票。糖糖當然已經落足眼力做定功課啦，唔知大家又點呢？不過無論點都好，唔好再中「冧把降」喇。

排球王子做公司掌舵

●奧運會要到2012年先有得睇，不過今年8月深圳就會舉行「第二十六届夏季世界大學生運動會」，都可以頂住癮先，不過呢個素有「小奥運會」之稱嘅世界大學生運動會，令糖糖有一個小小發現。

話說喺內地一份財經報一版賀稿裏面，發現今年夏季世界大學生運動會，竟然同香港上市嘅中國龍新能源（0395）拉上關係。剛剛喺今個月上任嘅董事局副主席汪嘉偉，唔講唔知，佢正正係70年代瘋魔中國球迷嘅中國排球王子，而且將與朗平率領排球明星對陣中國大運男排，認真威威！

中國龍新能源主要從事研發及製銷各種鋯化學品、新能源材料，但喺今年初轉型，收購寧波嘅石油倉儲同批發業務，排球王子汪嘉偉就上場喇。咦，近日大市咁波動，唔知公司嘅新人事變動，會唔會係一次新對陣，好戲在後頭呢？搞到糖糖好期待喎。

運通搞理財訓練班

●美國運通剛剛同國際成就計劃再度攜手，搞咗個「JA個人理財工作坊」，幫助後生仔掌握理財技巧，喺日前工作坊上面，就有超過300個中二至中四學生參加工作坊，嚟自美國運通商界義工指導，學習收入、消費、預算、信貸同投資嘅基本理財技巧。

話就話係基本技巧，糖糖認為，好多大人連呢啲技巧都唔識，否則呢個世界又點會有咁多錄爆卡、爭卡數嘅情況吖！

http：//tongtong-hkdn.blogspot.com/