B03 | 新報財經 | 中環物語 | By 糖糖 2011-06-23
四叔派薑醋券 慶添丁
●李家為添了望穿秋水,終於,徐子淇為老爺恒地(0012)主席李兆基添多個男孫,唔單止四叔同再做爸爸嘅李家誠興奮莫名,就連恒地員工都咁Happy,事關連恒地員工都咁開心,因為四叔佢最興就係與民同樂。
記者採訪大陣仗
噚日恒地有個100億銀團貸款簽約儀式,各大娛樂記者聞風而至,再加上財記同港聞靜態行家,真係好大陣仗,雖然記者無恒地員工咁幸福,不過四叔見到咁多記者到場「祝賀」,佢好識做,喺現場攞咗一大疊薑醋券出嚟派,人人有份,永不落空。糖糖喺現場俾四叔嘅幸福表情感染咗,都好替佢高興。
無飛機郵輪送畀孫仔
四叔話,暫時未為呢位乖孫改名,不過覺得個孫仔似足爸爸Martin咁樣好,五官端正,咦!咁咪即係間接讚自己個仔啫。徐子淇依家坐緊月,相信有排都唔可以出入ball場,在場娛記緊係問下新抱子淇近況、有無水腫咁啦,Martin話,老婆好好,正喺度休息中,仲護妻深切咁叫記者自己睇發相,一啲都無水腫咁話,恩愛之情show晒出嚟。
四叔出手闊綽,大家又好關心問今次有無買啲咩飛機郵輪送畀孫仔,四叔同Martin齊聲否認,四叔仲反問在場記者,問我哋會唔會送咁多嘢畀仔女喎。大家梗係得個笑字啦,不過糖糖心諗,我哋又點同四叔你比較呀,講笑咩!
http://tongtong-hkdn.blogspot.com/
沒有留言:
發佈留言