滙控鄭海泉感慨將退休 2011-05-20

新報
B03  |   新報財經  |   中環物語  |   By 糖糖  2011-05-20

滙控鄭海泉感慨將退休

●噚日滙控（0005）喺香港舉行非正式股東會，會上有股東話就現場環境看來，滙控股東似有老化迹象，記者當然唔放過呢條問題，完咗股東會後就追問管理層有乜看法，集團主席范智廉回應話如果只係基於倫敦策略日同香港嘅非正式股東會，就下此定論一啲都唔公平喎，因為呢兩日喺時間上都係返工時間，啲後生仔要返工，點有時間出席吖！佢仲話依家啲後生仔好多時都會上網睇，所以唔親身出席，絕對唔代表滙控股東有老化迹象，佢仲講笑咁話一眼望落去都唔覺出席嘅人有老化迹象吖。唔知佢咁講係咪順便讚埋自己後生呢？


鄭海泉最後一天上班



講返個股東會，作為滙控歷年嚟第一位華人大班、集團執行董事鄭海泉（見圖），好快就同大家say goodbye退休嘆世界喇，被問到退休有乜感想時，鄭大班好感慨咁話：「好榮幸在滙控工作了33年，畀了好多機會我，唔單止能夠令我養妻活兒，亦更加能夠令我喺金融界方面學到好多嘢，離開滙控喺一個唔容易的決定，因為滙控喺一個好好的集團，同埋喺Mr.Flint（范智廉）同Stuart（歐智華）底下，喺會繼續有好多成功的故事話畀我聽，對新隊伍絕對有信心。」

下星期滙控將於倫敦舉行股東會，到時鄭海泉都會出席，之後正式退休，惟佢仍然會繼續做歐智華顧問。


美高梅記者會爆棚

●美高梅中國（2282）噚日喺港島香格里拉開記者會，可能係間房太細、又可能係何超瓊魅力太大，結果現場吸引咗約50個中外葡傳媒到場，直情可用「密匝匝蟻排兵」形容！