巴菲特係股神 郭台銘話唔覺喎 2011-06-10

新報 B04  |   新報財經  |   中環物語  |   By 糖糖	2011-06-10
巴菲特係股神 郭台銘話唔覺喎 ●當外界千方百計、狂掟金錢、爭 過你死我活，就係為咗同股神巴菲特食一個午餐時，偏偏鴻海嘅郭台銘就對巴菲特嗤之以鼻。佢喺股東會上話，巴菲特根本唔係乜嘢股神，只係有啲小聰明咁大把 啫。郭總喺言談間，唔單止鄙視呢位被世人奉若神明嘅股神，而且仲嘲笑佢投資比亞迪（1211）咁話。 糖糖唔知郭總係咪因為同比亞迪嘅官司打咗5年都未打完嘅關係，索性嚟個「愛屋及烏」反轉版，連敵人嘅朋友都一併當埋敵人咁看待呢。難怪有人話，有時男人嬲起上嚟，分分鐘會小氣過啲女人架。但係糖糖認為，郭總份人係恩怨分明多啲喇。 午餐會競投價料破紀錄 記得郭總曾經講過，話試過寫信畀巴菲特，就佢投資比亞迪問咗3條問題，但封信就一去無回頭，股神連一隻字都無回覆。糖糖喺度諗，郭總既然大把錢，索性加入今次同巴菲特食午餐嘅競投中，如果Bit贏咗，咪可以面對面同巴菲特講足3粒鐘囉。 講番今次慈善午餐會競投，最快喺聽晚就會有結果；嚿年嘅中標價係263美金，今年應該可以再創高峰，打破舊年紀錄。 新規矩：唔准講股票 不過，當兩位神秘人競投得如火如荼之際，英國方面有消息傳出，話為咗防止幸運兒借住同巴菲特共進午餐時，炒作個人股票行為，慈善午餐會出咗個新規則，就係喺午餐會上唔可以講股票喎。唓！連最重要嘅嘢都唔傾得，就等於去自助餐唔畀人食生蠔、龍蝦呢啲回本菜啫，有啲揾笨囉！ http://tongtong-hkdn.blogspot.com/