聯想一口氣攞8個獎 2011-05-23

新報 B03  |   新報財經  |   中環物語  |   By 糖糖	2011-05-23
聯想一口氣攞8個獎
●聯想集團（0992）最近好 威，獲一份財經雜誌評選為「2011年度亞洲最佳管理公司」，唔單止咁，而且仲一口氣攞埋中國最佳管理公司、最佳投資者關係、最佳公司管治、最佳企業社會 責任第二名，而聯想嘅楊元慶同黃偉明，亦都分別攞到中國最佳首席執行官同首席財務官第二名，至於最致力維持優厚派息政策呢個獎，聯想亦攞第三名。 不過，其實攞咩獎都勢係假，小股民最關心嘅肯定係股價同業務前景。聯想股價由12月開始，由5.72蚊一直反覆尋底，其中喺3月中時，更加一度跌穿4蚊，其後雖然有反彈，但距離5字頭仲有一段距離。 聯想上周五收市報4.22元，微升0.238%，而好彩喺業務方面，聯想胸懷大志，甚至乎想同蘋果爭一日之長短，佢地推出智能手機樂Phone同平板電腦 樂Pad，喺下個月樂Pad仲會作全球推廣，有消息話，今年聯想除國內市場外，仲會重點拓展美國市場，斥巨資向美國年輕人發布一系列全新品牌廣告。 姑勿論今次一役勝數有幾多，糖糖就認為今次新產品，係擺到明衝住蘋果嘅iPhone同iPad而嚟，事關樂Phone同樂Pad呢兩個名實在好有挑釁意味。不過，咁都好嘅，證明聯想唔怕貨比貨。 總商會請市民搭車船 ●今年係香港總商會成立150周年，為咗隆重其事，總商會決定與民同樂，邀請到同樣有百幾年歷史嘅天星小輪同電車合作，史無前列咁喺6月9日舉辦免費拾電車渡輪日。 到時有15輛印有總商會150周年標誌同贊助商標嘅電車，免費俾市民不停來往港島西至筲箕灣，而喺同一日，市民都可以喺渡輪服務時間內，免費往來中環至尖沙嘴線嘅渡海小輪。糖糖一於約埋同事一齊搭免費電車返工先！