韋奕禮最難忘雷曼爆煲 2011-06-09

新報
B03  |   新報財經  |   中環物語  |   By 糖糖  2011-06-09

韋奕禮最難忘雷曼爆煲

●韋奕禮噚日最後一日返工，同記者來一個臨別秋波。在任6年，韋奕禮話自己最唔捨得嘅就是證監會同事及業界。不過，做咗6年，偏偏遇上震驚全球嘅雷曼風暴，加上雷曼苦主日日喺中環辦公室敲鑼打鼓，你都咪話呢段經歷唔難忘。

韋奕禮話，呢6年間最低潮嘅時候，就是雷曼啱啱爆煲時，當時佢飛咗13個鐘頭機，長途拔涉咁去開會，喺馬德里機場落機剛剛到步唔夠5分鐘，就收到雷曼爆煲嘅消息，諗過度過，咩會都唔夠呢單野重要，心知大事不妙，於是喺機場停留5分鐘之後，就起程搭返十幾個鐘頭機返香港總壇執手尾。


最開心苦主得賠償

不過，韋奕禮覺得最開心的就喺可以幫助大部份雷曼苦主拿翻大部份的賠償，他仲打趣話，如果買喺同期買滙豐（0005）股票，個回報率都唔夠賠償咁高喎！
雖然話天下無不散之筳席，但係韋奕禮亦都深知，今次同香港傳媒say goodbye後都唔知幾時再見。話晒都係last day，韋奕禮開完記者會後，繼續留低同記者簽名影相，跟咗佢6年嘅記者、同事梗喺依依不捨啦，韋奕禮都好識做，滿足所有人嘅要求，成個大名星咁。糖糖當然唔執輸，專登攞本證監會2010至2011年年報，俾韋奕禮喺年報張相隔離即席揮毫，簽咗個大名，作為小小紀念。

當然，唔捨得還唔捨得，各位行家繼續窮追猛打咁，希望喺韋奕禮口中探知繼任人係邊個。市場傳聞繼任者都係老外，韋奕禮依然好口密，洒手兼拎頭，話咩都唔知，留俾政府決定啦。

韋奕禮為糖糖簽名留念，後會有期！

電盈小股東表感謝

相信當大家睇到呢篇糖糖時，韋奕禮已經離開咗香港喇，不過唔係返英國住，而係去旅行放鬆下。唔捨得韋奕禮嘅，除了記者之外，仲有一班雷曼苦主，噚日依然堅持向證監會樓下集會「歡送」佢。

而一班電信盈科（0008）嘅小股東大聯盟，更發公開信，由衷感謝韋奕禮過去6年為保障小投資者權益所作嘅貢獻。


http://tongtong-hkdn.blogspot.com/