招行粉絲行內最多 2011-06-01

招行粉絲行內最多 

●如果要投資內銀股，可能要睇間銀行盈利能力、市值、市盈率、負債比率、發展空間等等一家族數據解析，但至於一間銀行受歡迎程度，就唔一定要咁理性。

根據今年3、4月銀行業微博營銷資訊檢測數據顯示，招商銀行（3968）嘅粉絲數量繼續喺內銀界稱王稱霸！招行依家喺微博上嘅粉絲數量有成498,864人，即使含括建行（0939）、中行（3988）、交行（3328）、工行（1398）等在內嘅16間銀行所有粉絲數量相加，都未及招行嘅30%左右，認真犀非利！其中排第二嘅建行粉絲數量只有43,818人，真係拍馬都追唔上。

點解招行有咁多微博粉絲呢？咁就要睇番各銀行發微博條數對比，招行一共發咗7,962條，排喺第一位，而統計數字最差嗰間郵政儲蓄銀行，只係發咗11條微博條數，難怪啦。不過，發得多都唔一定吸引到人睇，如果係廢話或者硬銷銀行的廣告訊息，真係你睇埋糖糖嗰份喇!

內容講時事多啲
糖糖上去招行個微博睇過，覺得招行個微博內容似係一個有趣嘅資訊者網站多啲，既有時事的評論，如近日內地鬧電荒，上調電價呢啲喺個博內都有提及。又有一啲財經軼事，好似其中一條話，講到金融人物，今有股神巴菲特、商品大王羅傑斯，古有範蠡。
範蠡係商聖， 他三次經商成巨富，然後三散家產，急流勇退，佢夏則資皮、冬則資絺、旱則資舟、水則資車；人棄我取、人取我與、順其自然、伺機而動，正正同巴菲特同羅傑斯嘅投資原則不謀而合。

最正係招行絕對唔會硬銷銀行業務，而採取軟性手法，例如喺兒童節，佢會提醒父母可以開始教小朋友理財，令其粉絲們潛移默化幫襯招行，呢招夠高呀。