招股書出錯 氣煞小股民

招股書出錯 氣煞小股民 

●雖然啲監管機構成日叫啲投資者，投資前要做足功課，但係成本字典咁厚嘅招股書，到底真係有幾多投資者逐頁逐頁咁去睇呢？不過話雖如此，但係作為上市公司，真係唔可以掉以輕心，搞到本招股書有錯處可以畀人捉㗎！

繼熱爆新股米蘭站（1150）招股書被人篤爆出現低級錯誤之後，另一隻新股龍翔（0935）又有出錯，仲要係錯喺每股盈利、P/E等重要資料上面，糖糖真係無眼睇。真係太陽底下無新事，呢啲咁嘅重要錯誤都唔係頭一趟，好似年頭招股嘅宏峰，亦曾經搞錯過個配售價。一啲唔温書嘅投資者可能可以避過一劫，但係若果有人真係根據招股書提供嘅錯誤資料去研究同分析，結果可以好大件事，輸咗錢係咪你賠返先？！

其實唔單止啲上市公司有責任，作為保薦人同公關公司絕對責無旁貸，要避免錯誤重覆發生，有網民就建議港交所（0388）應該整個懲罰機制，例如係禁止出錯嘅單位日後參與上市工作一段時間等等。糖糖都好認同，始終港交所絕對唔應該隻眼開隻眼閉架！


經濟越好?女性上圍越大

●有份研究話，經濟好，女性上圍就會越大，話1920年經濟大蕭條時期，英女性上圍平均只28A，但隨着經濟起飛，今日英國女性平均上圍已經脹到36D！有間英國百貨公司Debenhams日前發表咗《大英帝國胸史》，原來唔單止上圍同經濟有關係，就連胸圍內衣款式都同經濟有正相關性。21年紀初期啲內衣款式含蓄內斂﹔60、70年代登月時期，有麥當娜嘅錐形胸圍﹔90年代女強人當道，甚至出現內衣外穿現象。

Debenhams仲話，專家們會繼續以女性胸圍尺寸嚟觀察經濟波動趨勢。糖糖好奇，唔知呢種現象係咪放諸四海皆準嘅呢？我哋祖國依家係全球經濟大國之一，難道意味着祖國女性身材係最勁？難怪糖糖打開份C1，見到咁多潘霜霜之類的物體出現啦。
糖糖