2011年7月7日星期四

每對出品鞋盈進主席親自試 & 滙豐做善事一啲都唔「立」 2011-06-30

新報
B03  |   新報財經  |   中環物語  |   By 糖糖  2011-06-30

每對出品鞋盈進主席親自試 
●盈進(1386)噚日搞咗個業績公布加飯局,同傳媒講下公司嘅發展,盈進做鞋做到眾所周知,公司執董兼財務總監朱賢文話,集團主席陳美雙對公司出品好嚴謹,每一對公司出品嘅鞋,主席都會親自試着,覺得時尚又舒服先至拍板銷售。嘩!盈進一年四季旗下幾個品牌每年出咁多對鞋,呀主席雙腳咪好唔得閒囉!

滙豐做善事一啲都唔「立」

●呢輪個市況波動,搞到滙豐(0005)個股價都麻麻地,唔聲唔聲咁喺75蚊呢啲水平上落,噚日好番啲,微升0.596%,收報75.95元。雖然股價立立哋,不過佢哋做慈善就一啲都唔立;噚日佢哋個慈善基金正式啓動30周年的慶祝活動,仲宣布額外捐出3千萬去造福香港社群,認真唔話得喇。
滙豐香港區總裁馬凱博喺個慶祝活動啓動儀式上話,嚟緊將會舉行一系列嘅活動畀公眾參與。糖糖覺得好好呀,事關市民嘅眼睛係雪亮嘅,一間有社會企業責任嘅公司,自然寧舍受公眾歡迎,加晒分。


陳裕聲料有大搞作

●香港商用飛機係香港同亞洲區首屈一指嘅商務飛機服務供應商,佢哋剛剛委任咗陳裕聲擔任企業發展總監,負責統籌公司嘅策略規劃同發展。

陳裕聲可以話係呢行嘅老行尊,喺30年嘅商業航空經驗裡面,佢擔任過唔同誇國航空公司嘅不同崗位,由空中少爺以至工程、業務發展及項目管理都做勻,對航空業肯定有大把心得。
咦,話晒呢行都有新競爭加入,糖糖相信金次香港商用飛機重金禮聘陳裕聲過檔,相信嚟緊肯定會有一番大搞作!


http://tongtong-hkdn.blogspot.com/

沒有留言:

發佈留言